Գիտաուսումնական խմբի առաջին գիտական սեմինարը

Դեկտեմբերի 12-ին Հայաստանի պետական տնտեսագիտական համալսարանի նիստերի սրահում «Ֆինանսական ծառայությունների հասանելիություն» գիտաուսումնական խումբն անցկացրեց իր առաջին գիտական սեմինարը, որի շրջանակներում խումբը ներկայացրեց իր առաջին միջանկյալ հաշվետվությունը: Սեմինարին մասնակցում էին ՀՊՏՀ գիտության և արտաքին կապերի գծով պրոռեկտոր Գագիկ Վարդանյանը, գիտաուսումնական մյուս խմբերի ղեկավարները և մասնակիցները, պրոֆեսորադասախոսական կազմի ներկայացուցիչներ, ուսանողներ: Ներկաներին ողջունեց պրոռեկտոր Գագիկ Վարդանյանը՝ նշելով, որ այս տարի մեկնարկած գիտաուսումնական խմբերի նախագիծը մեծ ներուժ ունի և Հայաստանում աննախադեպ է, դրա հիմնական նպատակներից է մագիստրանտների ներգրավումը գիտահետազոտական աշխատանքներին: Պրոռեկտորն ընդգծեց, որ բուհի ղեկավարության կողմից կարևորվում են հետազոտական աշխատանքները, քանի որ դրանք նպաստում են որակյալ կադրերի պատրաստմանը: Անդրադառնալով նշված խմբին՝ Գագիկ Վարդանյանն ասաց, որ 2014-2015թթ. գիտաուսումնական խմբերի մեջ այս խումբը միակ միջազգային խումբն է:

Խմբի ղեկավար, ՀՊՏՀ գիտության բաժնի պետ, տնտեսագիտության թեկնածու, դոցենտ Խորեն Մխիթարյանը ներկայացրեց խմբի կազմը, հիմնական առաքելությունը՝ անդրադառնալով գիտաուսումնական խմբի կողմից կատարված աշխատանքներին և առաջիկա ծրագրերին:

Այնուհետև Խորեն Մխիթարյանը և խմբի մասնակից ՀՊՏՀ արտաքին կապերի բաժնի գլխավոր մասնագետ, տնտեսագիտության թեկնածու, դոցենտ Աղավնի Հակոբյանը լուսապատկերի միջոցով ներկայացրեցին խմբի կողմից կատարված աշխատանքի առանցքային դրույթները, այդ թվում՝ ելակետային հետազոտության ակնկալվող արդյունքները՝ ուղղված Հայաստանի Հանրապետության ֆինանսաբանկային հաստատությունների ծառայությունների հասանելիության գնահատմանը, հասանելիությանը խոչընդոտող պատճառների և խնդիրների վերհանմանը, վերջիններիս վերացմանն ուղղված առաջարկությունների մշակմանը, ֆինանսական ծառայությունների կապուղիների արդյունավետության գնահատմանը, ֆինանսական հասանելիության միջոցով ՓՄՁ-ի զարգացման հնարավորությունների գնահատմանը, ինչպես նաև առևտրային բանկերի մասնաճյուղային ցանցի արդյունավետ տեղաբաշխման առաջարկությունների մշակմանը:

Ամփոփ ներկայացվեցին ֆինանսական համակարգը բնութագրող հիմնական ցուցանիշների դինամիկան 2004-2014 թվականների ընթացքում, այդ թվում՝ առևտրային բանկերի և վարկային կազմակերպությունների, դրանց մասնաճյուղային ցանցի, ներդրումային, ապահովագրական ընկերությունների, գրավատների, արտարժույթի առք ու վաճառքի կետերի, դրամական փոխանցումներ իրականացնող ընկերությունների գործունեության քանակական ցուցանիշներ: Ներկայացված տվյալները վկայում էին այն մասին, որ հաշվետու ժամանակահատվածում դիտվել է թե′ առևտրային բանկերի, և թե′ վարկային կազմակերպությունների մասնաճյուղերի թվաքանակի շեշտակի աճ: Այսպես՝ 2004 թվականի համեմատությամբ 2013 թվականին առևտրային բանկերի մասնաճյուղերի թիվն ավելացել է 115-ով, իսկ 2008 թվականի համեմատ՝ 242-ով: Նույն ժամանակահատվածում աննախադեպ աճ են արձանագրել նաև վարկային կազմակերպությունները, որոնց մասնաճյուղերի թիվը 2004 թվականի համեմատ աճել է 39-ով, իսկ 2013 թվականին բազիսային ժամանակահատվածի համեմատ՝ 101-ով:

Խումբը ներկայացրեց նաև վճարահաշվարկային հարաբերությունները բնութագրող ցուցանիշների դինամիկան՝ նշելով ԱԳՄ-ների, POS-տերմինալների, շրջանառության մեջ քարտերի և դրանցով իրականացվող գործառնությունների զգալի աճի մասին վկայող միտումների մասին: Դիտարկվեցին նաև Հայաստանի Հանրապետության մարզերում ֆինանսական ծառայությունների հասանելիությանն և օգտագործմանն առնչվող տվյալները: Բանախոսները ներկաների ուշադրությունը հրավիրեցին առևտրային բանկերի մասնաճյուղերի մարզային անհամաչափ բաշխվածության վրա: Այսպես, 2014 թվականի դրությամբ ՀՀ-ում գործող առևտրային 21 բանկերի 492 մասնաճյուղերից 224-ը գործում են ք.Երևանում, 42-ը՝ Կոտայքի մարզում, 41-ը՝ Լոռիում, իսկ ամենաքիչ թվով մասնաճյուղերը՝ Վայոց Ձորում, որտեղ դրանց թիվը կազմում է ընդամենը 11-ը:

Խմբի անդամները հատուկ ընդգծեցին, որ հետազոտության շրջանակներում կարևորվում են ոչ միայն ֆինանսական ծառայությունների հասանելիության, այլև՝ դրանց օգտագործման հիմնահարցերը, ինչպես նաև փորձ է արվելու վեր հանել ֆինանսական հասանելիությանը խոչընդոտող հանգամանքները և պատճառները: Խումբը իր հետազոտությունների տիրույթում դիտարկում է ոչ միայն Հայաստանի Հանրապետությունում ֆինանսական ծառայությունների հասանելիությանն առնչվող հիմնահարցերը, այլև դրանց զարգացման առկա մակարդակը և զարգացման հեռանկարները Եվրոպական Միության, ինչպես նաև Եվրասիական Տնտեսական Միության անդամ-երկրներում: 

Բանախոսները ներկայացրեցին նաև հետագա ուսումնասիրման ենթակա թիրախային ոլորտները՝ ընդգծելով ֆինանսական ծառայությունների հասանելիության գնահատման նպատակով իրավաբանական և ֆիզիկական անձանց շրջանում համապատասխան հարցում անցկացնելու մտադրության մասին: 

Այնուհետ գիտաուսումնական խմբում ընդգրկված ՀՊՏՀ մագիստրանտներ, Սիրիայի Արաբական Հանրապետության քաղաքացիներ Մահմուդ Ալդելան, Ռանիմ Ալզաինը և Շադի Ջենդին հաջորդաբար հանդես եկան զեկուցումներով՝ ներկայացնելով Սիրիայի Արաբական Հանրապետության ֆինանսական շուկայի ընդհանուր բնութագիրը՝ պատերազմից առաջ և հետո, պատերազմի ազդեցությունն ու հետևանքները Սիրիայի ֆինանսական համակարգի վրա և ֆինանսական ծառայությունների հասանելիության որոշ ասպեկտներ՝ հիմնականում պետական և մասնավոր բանկերի օրինակով: Սեմինարի ավարտին ծավալվեց քննարկում, մասնավորապես հարցադրումներով հանդես եկան գիտության և արտաքին կապերի գծով պրոռեկտոր Գագիկ Վարդանյանը, Տնտեսական ինֆորմատիկայի և տեղեկատվական համակարգերի ամբիոնի վարիչ Վարդան Սարգսյանը, ՏԿ և ՄՏՀ դեկան Ատոմ Մարգարյանը և ուրիշներ: Հիշեցնենք, որ գիտաուսումնական խմբի հաջորդ գիտական սեմինարը տեղի կունենա 2015 թվականի մարտի 9-ին:

Կարդալ

«Ֆինանսական ծառայությունների հասանելիություն» գիտաուսումնական խմբի սեմինարների անցկացման ժամանակացույց

ԱՌԱՋԻՆ ՄԻՋԱՆԿՅԱԼ ՀԱՇՎԵՏՎՈՒԹՅՈՒՆ՝ 12.12.2014թ.

ԵՐԿՐՈՐԴ ՄԻՋԱՆԿՅԱԼ ՀԱՇՎԵՏՎՈՒԹՅՈՒՆ՝ 09.03.2015թ. 

ՇՆՈՐՀԱՆԴԵՍ` 08.06.2015թ.

Կարդալ

ԳՈւԽ-ի առաջին գիտական սեմինարը

Սույն թվականի դեկտեմբերի 12-ին ՀՊՏՀ նիստերի սրահում տեղի կունենա «Ֆինանսական ծառայությունների հասանելիություն» գիտաուսումնական խմբի առաջին գիտական սեմինարը: Սեմինարի շրջանակներում խմբի ղեկավար, ՀՊՏՀ գիտության բաժնի պետ տնտեսագիտության թեկնածու դոցենտ Խորեն Մխիթարյանը, խմբի մասնակիցներ՝ ՀՊՏՀ արտաքին կապերի բաժնի գլխավոր մասնագետ, տնտեսագիտության թեկնածու, դոցենտ Աղավնի Հակոբյանը, ՀՊՏՀ «Գործարար կառավարում» մասնագիտության մագիստրոսներ Ռանիմ Ալզաինը, Մահմուդ Ալդելան և Շադի Ջենդին կներկայացնեն խմբի առաջին միջանկյալ հաշվետվությունը:

Կարդալ

Գիտաուսումնական խմբի հերթական աշխատանքային հանդիպումը

Ս.թ. նոյեմբերի 11-ին տեղի ունեցավ «Ֆինանսական ծառայությունների հասանելիության արդի հիմնահարցերը Հայաստանի Հանրապետությունում» գիտաուսումնական խմբի հերթական աշխատանքային հանդիպումը, որի ընթացքում խմբի ղեկավար տնտեսագիտության թեկնածու, դոցենտ ՀՊՏՀ գիտության բաժնի պետ Խորեն Մխիթարյանն ամփոփեց սեպտեմբեր-հոկտեմբեր ամիսներին խմբի կատարած աշխատանքները, ընդգծեց խմբի աշխատանքներն առավել արդյունավետ և թափանցիկ կազմակերպելու անհրաժեշտությունը՝ նախանշելով առաջիկա անելիքները և ծրագրերը: 

Հանդիպման ընթացքում հստակեցվեցին ֆինանսական ծառայությունների հասանելիության ուսումնասիրության և համադրության ենթակա երկրների խմբերը, խմբի կայքի կատարելագործման ուղղությունները, ինչպես նաև քննարկվեցին շահագրգիռ կառույցների ներկայացուցիչների հետ հանդիպումների կազմակերպմանն առնչվող հարցեր:

Կարդալ

ՀՊՏՀ գիտաուսումնական խմբերը` աշխատանքային քննարկմանը

Հոկտեմբերի 20-ին ՀՊՏՀ նիստերի սրահում տեղի ունեցավ ՀՊՏՀ գիտաուսումնական խմբերի հերթական աշխատանքային քննարկումը՝ նվիրված խմբերի կայք-էջերին:

Շնորհանդեսին, որը նաև աշխատանքային հանդիպում էր, մասնակցում էին գիտության և արտաքին կապերի գծով պրոռեկտոր Գագիկ Վարդանյանը, գիտության բաժնի պետ Խորեն Մխիթարյանը, գիտաուսումնական խմբերի ղեկավարները, մասնակիցները: Գագիկ Վարդանյանը ողջունեց ներկաներին, ապա նշեց, որ գիտաուսումնական խմբերի նախագիծը ոչ միայն պետք է բարեհաջող տեղայնացնել, այլև զարգացնել, և դրանք համապատասխան էլեկտրոնային ռեսուրսով ներկայացնելը այդ քայլերից մեկն է:

Հանդես եկան գիտաուսումնական 8 խմբերից 3-ը՝ Ազգային ինովացիոն համակարգ, խմբի ղեկավար՝ տ.գ.թ., դոցենտ Ատոմ Մարգարյան, ֆինանսական ծառայությունների հասանելիություն, խմբի ղեկավար՝ տ.գ.թ., դոցենտ Խորեն Մխիթարյան, Ցանցային տնտեսություն, խմբի ղեկավար՝ տ.գ.դ., պրոֆեսոր Վարդան Սարգսյան:

Նախատեսվում է, որ նորաստեղծ կայք-էջերը այցելուներին համակողմանիորեն կներկայացնեն տվյալ խմբի գործունեությունը, գիտական արդյունքը: 3 խմբերը ներկայացան տարբեր ձևաչափերով և լուծումներով, այնուհանդերձ, հիմնական խնդիրը՝ հնարավորինս հասանելի դարձնել գիտաուսումնական խմբի գործունեությունը, արդեն տեսանելի էր:

Եզրափակելով հանդիպումը՝ պրոռեկտոր Գագիկ Վարդանյանը կոչ արեց ստեղծված հարթակն օգտագործել լիարժեք և հանդիպումից հանդիպում հանդես բերել ստեղծարար նորանոր մոտեցումներ:

Հավելենք, որ գիտաուսումնական խմբերի կայք-էջերը վերջնարդյունքում հասանելի կլինեն նաև ՀՊՏՀ պաշտոնական կայքում:

Հրապարակումը վերցված է ՀՊՏՀ պաշտոնական կայքից (ՀՊՏՀ լրատվության և հասարակայնության հետ կապերի բաժին)

Կարդալ

Մեկնարկեցին ՀՊՏՀ գիտաուսումնական խմբերի աշխատանքները

ՀՊՏՀ նիստերի սրահում սեպտեմբերի 5-ին կայացավ հանդիպում, որով տրվեց գիտաուսումնական խմբերի աշխատանքների մեկնարկը: Հանդիպմանը մասնակցում էին գիտության և արտաքին կապերի գծով պրոռեկտոր Գագիկ Վարդանյանը, գիտության բաժնի պետ Խորեն Մխիթարյանը, գիտաուսումնական խմբերի ղեկավարները, մասնակիցները: Գագիկ Վարդանյանը, ողջունեց ներկաներին, ապա նշեց, որ Տնտեսագիտական համալսարանը սկսել է մի նախագիծ, որը նախադեպը չունի Հայաստանում:

«Գիտաուսումնական խմբերի նախագիծը ամենափորձված մեթոդն է ուսանողությանը հետազոտական աշխատանքներում ներգրավելու համար: Այն նաև ստեղծարար ունակությունները զարգացնելու հրաշալի ձև է: Նշենք, որ ներկայացված 21 հայտից 8-ն այս փուլում հաստատվել է, գիտաուսումնական խմբերից մեկը միջազգային է»,-ընդգծեց պրոռեկտորը:

Խորեն Մխիթարյանը լուսապատկերի միջոցով ներկայացրեց գիտաուսումնական խմբերի կայք-էջերի պահանջները, պատասխանեց ներկաների հարցերին: Հանդիպման ավարտին ելույթ ունեցան նաև խմբերի ղեկավարները՝ ողջունելով նախագիծը:

Նշենք, որ գիտաուսումնական խմբերի գործունեության համար նախատեսված է ինը ամիս. նախագիծը կավարտվի 2015թ. մայիսի 30-ին, աշխատանքների արդյունքները կներկայացվեն ՀՊՏՀ պաշտոնական կայքում:

Գիտության բաժնի պետը լրատվության և հասարակայնության հետ կապերի բաժնին հաղորդեց, որ նման նախագծերը ՀՊՏՀ-ում շարունակական են լինելու:

2014-2015թթ. գիտաուսումնական խմբերի ղեկավարների և մասնակիցների ցուցակին կարող եք ծանոթանալ հետևյալ հղումով՝ http://media.asue.am/upload/gitausumnakan/Grands_LIST.pdf :

Հրապարակումը վերցված է ՀՊՏՀ պաշտոնական կայքից (ՀՊՏՀ լրատվության և հասարակայնության հետ կապերի բաժին)

Կարդալ

Նպատակներ և խնդիրներ

Նախագծի նպատակներն են՝

• առևտրային բանկերի ֆինանսական ծառայությունների հասանելիության զարգացման տեսագործնական մոտեցումների մշակումը, 
• ֆինանսական ծառայությունների հասանելիության կատարելագործման և արդյունավետության բարձրացման առաջարկությունների մշակումը, 
• ֆինանսական ծառայությունների հասանելիության և մատչելիության խոչընդոտների բացահայտումը,
• բնակչության տարբեր եկամուտներ ունեցող խմբերի ֆինանսական հասանելիության պատճառների և խոչընդոտների վերհանումը,
• տարբեր երկրներում ֆինանսական ծառայությունների հասանելիության համեմատական վերլուծության շնորհիվ Հայաստանի Հանրապետությունում առևտրային բանկերի ֆինանսական ծառայությունների հասանելիության կատարելագործման առաջարկությունների մշակումը և ներկայացումը: 

  Գիտաուսումնական խումբն իր առջև խնդիր է դրել՝

• մշակել շահագրգիռ հաստատությունների կողմից ֆինանսական ծառայությունների հասանելիության կարևորության գիտակցումը երաշխավորող մոտեցումներ, 
• մշակել առևտրային բանկերի մասնաճյուղային ցանցի արդյունավետ տեղաբաշխման և գործունեության արդյունավետությանը նպաստող առաջարկություններ, 
• գնահատել ֆինանսական ծառայությունների հասանելիության շնորհիվ փոքր և միջին ձեռնարկատիրության զարգացման հնարավորությունները,
• բացահայտել ֆինանսական ծառայությունների հասանե­լիութ­յան ընդլայնման միջոցով բանկերի շահութաբերության ցուցանիշների աճի հնարավորությունները, 
• ուսումնասիրել Հայաստանի Հանրապետության առևտրային բանկերի մասնաճյուղերի գործունեության և զարգացման միտումները,
• մշակել իրավաօրենսդրական դաշտի կատարելագործման առաջարկություններ և բնակչության հեռահար բանկային սպասարկման զարգացման առաջարկություններ:

Կարդալ

Ֆինանսական ծառայությունների հասանելիության արդի հիմնահարցերը Հայաստանի Հանրապետությունում

ՖԻՆԱՆՍԱԿԱՆ ԾԱՌԱՅՈՒԹՅՈՒՆՆԵՐԻ ՀԱՍԱՆԵԼԻՈՒԹՅԱՆ ԱՐԴԻ ՀԻՄՆԱՀԱՐՑԵՐԸ ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ

  Գիտաուսումնական խումբը ձևավորվել է Հայաստանի պետական տնտեսագիտական համալսարանի 2014-15 թվականների Գիտաուսումնական խմբերի դրամաշնորհայն մրցույթի շրջանակներում` «Ֆինանսական ծառայությունների հասանելիության արդի հիմնահարցերը ՀՀ-ում» թեմայի հետազոտման նպատակով: Խմբի առանձնահատկությունը հետազոտական աշխատանքներում Հայաստանի պետական տնտեսագիտական համալսարանի «Գործարար կառավարում» մասնագիտության մագիստրատուրայի ավարտական կուրսում ուսումնառող օտարերկրյա երեք մագիստրոսների ընդրկումն է, ովքեր ուսանում են Հայաստանի Հանրապետության և Սիրիայի Արաբական Հանրապետության միջկառավարական համաձայնագրի շրջանակներում: Գիտաուսումնական խումբն ակնկալում է հետազոտության արդյունքները ներկայացնել եռալեզու ձևաչափով:

ՆԱԽԱԳԾԻ ՀԱՄԱՌՈՏԱԳԻՐ ԵՒ ԱՌԱՔԵԼՈՒԹՅՈՒՆ

  Ֆինանսական ծառայությունների հասանելիության հիմնախնդրի ուսումնասիրության արդիականությունը պայմանավորված է հարափոփոխ աշխարհում բնակչության պահանջմունքներին համարժեքորեն և արդյունավետորեն արձագանքելու ֆինանսաբանկային համակարգի ներուժի գնահատման, առկա հիմնահարցերի բացահայտման, դրանց լուծման ուղիների և գերակայությունների ընտրության անհրաժեշտությամբ: Ֆինանսական ծառայությունների հասանելիությունը երկրի ֆինանսաբանկային համակարգի զարգացման կարևոր ցուցիչներից է, որն արտացոլում է ֆինանսական հասանելիության ինստիտուցիոնալ առաջնահերթությունները, ինչպես նաև առևտրային բանկերի մասնաճյուղային ցանցի արդյունավետ տեղաբաշխման հնարավորությունները: Ֆինանսական ծառայությունների հասանելիությունն աղքատության դեմ պայքարի առանցքային տարրերից է և ներառական տնտեսական զարգացման կարևորագույն նպատակներից: Ֆինանսական հասանելիության հավաստի տվյալներն առանցքային նշանակություն ունեն պետության մակրոտնտեսական քաղաքականության մշակման և ֆինանսական քաղաքականության արդյունավետության գնահատման համար: Ֆինանսական հասանելիության գնահատումն իրականացվում է ֆինանսական ծառայությունների հասանելիութան, ֆինանսական ծառայությունների օգտագործման, ֆինանսական արդյունքների և ծառայությունների որակի ցուցանիշներով:

  Ֆինանսական ծառայությունների հասանելիության վերլուծությունն արդիական է ոչ միայն զարգացած, այլև զարգացող երկրների համար: Ֆինանսական հասանելիության խնդիրն արդիական է նաև Հայաստանի Հանրապետության համար՝ հաշվի առնելով տնտեսության և հանրության համար վերջինիս դրական էֆեկտները, Հայաստանի Հանրապետության ֆինանսաբանկային համակարգի զարգացման արդի միտումները և մասնաճյուղային ցանցերի ընդլայնման առկա դինամիկան: Ֆինանսական ծառայությունների հասանելիության ընդլայնումը կարևորագույն մարտահրավեր է, որն անհնար է առանց պետության դրամավարկային քաղաքականության գործիքակազմի արդյունավետ օգտագործման:
Գիտաուսումնական խմբի առաքելությունը առևտրային բանկերի մասնաճյուղային ցանցերի զար­­գացման և դրանց ծառայությունների հասանելիության գնա­հատ­­ման տեսամեթոդական և գիտագործնական հիմնահարցերի վերլուծությունն է:

Կարդալ